【伏唔伏】世上真係有免費午餐？試伏小薯話你知！
最近試伏小薯搜尋到一個免費請食一餐健康餐活動，於是好似發現新大陸咁同身邊朋友、同事開心些牙。但朋友、同事一聽到，都異口同聲話：「伏味濃！」、「世上無免費午餐，一定中伏！」、「你試完話我知！」... 睇嚟大家都對「免費午餐」呢件事好有保留，但試伏小薯一聽到「免費午餐」呢幾個字，就雙眼即時發哂光、好想試食！於是，做冬前一日訂購咗20/12（五）嘅午餐，親身試下伏定唔伏！ 一、訂餐流程網上訂餐流程非常方便，用戶需要提早至少一日預訂，當選擇訂餐時，系統就會自動提供午餐推介方案，啱哂選擇困難症嘅朋友，可以唔使煩食乜餸！ 如果唔鐘意系統提供嘅方案，亦都可以自選，就好似兩餸飯咁，任君選擇。 系統嘅圖片會顯示每款菜式/ 飯嘅卡路里，方便減肥/ 健身/ 注重健康飲食嘅人士。呢點好貼心、吸引！而且，賣家嘅食物示範圖影得幾靚、顏色好豐富、照片影得好吸引，睇嚟公司係有課金請設計師或攝影師設計過，幾有心思！ 試伏小薯見系統推介比我嘅菜式都比較偏清淡，所以都係自選自己鐘意食嘅黑椒燒汁烤豬扒、栗米蒸水蛋、炒翠玉瓜、雜糧飯。
最近試伏小薯搜尋到一個免費請食一餐健康餐活動，於是好似發現新大陸咁同身邊朋友、同事開心些牙。但朋友、同事一聽到，都異口同聲話：「伏味濃！」、「世上無免費午餐，一定中伏！」、「你試完話我知！」...
睇嚟大家都對「免費午餐」呢件事好有保留，但試伏小薯一聽到「免費午餐」呢幾個字，就雙眼即時發哂光、好想試食！於是，做冬前一日訂購咗20/12（五）嘅午餐，親身試下伏定唔伏！
一、訂餐流程
網上訂餐流程非常方便，用戶需要提早至少一日預訂，當選擇訂餐時，系統就會自動提供午餐推介方案，啱哂選擇困難症嘅朋友，可以唔使煩食乜餸！
如果唔鐘意系統提供嘅方案，亦都可以自選，就好似兩餸飯咁，任君選擇。
系統嘅圖片會顯示每款菜式/ 飯嘅卡路里，方便減肥/ 健身/ 注重健康飲食嘅人士。呢點好貼心、吸引！而且，賣家嘅食物示範圖影得幾靚、顏色好豐富、照片影得好吸引，睇嚟公司係有課金請設計師或攝影師設計過，幾有心思！
試伏小薯見系統推介比我嘅菜式都比較偏清淡，所以都係自選自己鐘意食嘅黑椒燒汁烤豬扒、栗米蒸水蛋、炒翠玉瓜、雜糧飯。
最後，可以選擇送餐/ 自取。送餐費比較貴，所以買滿$60 選擇到分店自取，可以唔使額外加服務費$10。
二、取餐體驗（門店自取）
到咗試伏嘅20/12，當日09:28 就收到WhatsApp 短訊，提示試伏小薯嘅健康餐已送達九龍灣分店自取點，用取餐碼就可以直接取餐。試伏小薯取餐時，已經見到有好多同類嘅保溫冰袋放喺櫃位，睇嚟大家都係勇者、唔怕伏，給一個respect。
因為時間比較早，未有太多人取餐，所以好快就可以拎到個飯盒。但如果到午餐時間1點前先取餐，就有可能要排長龍。
收銀員姐姐話：「保溫袋、飯盒、所有嘢都包晒，唔需要還盒、唔使還保溫袋。」聽到個陣，我都有啲意外，因為個保溫袋好厚實，可以再用、放其他嘢都可以。第一印象拎到個保溫袋時，覺得飯盒好輕身、感覺好乾淨衛生，就咁叮返熱就可以食得，非常方便！
雖然係「免費午餐」，但包裝唔馬虎，感覺唔錯。
三、免費午餐有咩食？
打開保溫袋，有兩對木筷子、兩個冰袋、自選嘅菜式、飯，每款菜式都有獨立嘅盒，感覺好乾淨衛生～
試伏小薯好心急咁等到放lunch時間，終於可以試食！既緊張又興奮～ XD
將全部餐盒放晒入微波爐一次過叮熱，等幾分鐘就可以食得，真係懶人恩物。
食物賣相唔錯～～ 雖然無賣家圖咁好睇，但餐盒顏色鮮豔，令人食慾大增！豬扒有豬扒味、菜肉瓜有菜肉瓜味、雜糧飯都幾好味～～只係粟米蒸水蛋味道淡咗啲、有啲 dry、得幾粒粟米粒。
整體嚟講，味道偏淡、少鹽少油，非常健康！成盒午餐全靠「黑椒燒汁烤豬扒」呢款菜式拉高整體水平同食物味道。如果全部都係素菜無肉，就會有啲淡而無味。
兩款菜+一款肉食+雜糧飯嘅配搭，營養均衡。試伏小薯覺得午餐份量望落細份，但幾飽肚，不過男士食嘅話可能會覺得只有7成飽。
四、試伏食評
整體評分：★★★★☆
味道：★★★★☆
衛生：★★★★★
抵食：★★★☆☆
方便：★★★★★
整體嚟講，試伏小薯覺得從免費嘅角度睇，呢個「免費午餐」，真心唔伏、值得推介！
但如果作為消費者課金食呢個「健康餐」就會覺得有少少貴、性價比相對兩餸飯/ 即叫嘅外賣自取就相對失色。因為「健康餐」份量較細份，點餐自取嘅最低消費係$60，若菜品總金額不足$60，需額外支付$10綜合服務費；菜品總金額達到$60或以上，無需支付綜合服務費。
平台點餐配送費需要訂滿$200先免運費，建議大家可以提早訂定一星期午餐，就可以免運費。
而且，作為佛系環保人士嘅試伏小薯，覺得「健康餐」可能會製造好多即棄膠盒。試伏小薯食完「健康餐」之後，有清洗乾淨餐盒、重用冰袋、重用保溫袋。但如果長期食「健康餐」，就會堆積大量保溫袋、冰袋、餐盒，所以建議商家可以回收冰袋、保溫袋、環保盒，以減少浪費。
建議大家食完「健康餐」後，都會清洗回收餐盒、重用保溫袋、重用冰袋～ 注重健康之餘，亦為環保出一份力！
注意：
1）餐盒標示可以耐熱最高100度，如翻熱高於100度要留意！
2）白色載飯紙餐盒標示「100%生物全降解」，清洗後已明顯變型、未能完全清洗乾淨，所以未必可重複使用。
五、試伏詳情
用手機號註冊做會員，可以免費食一餐午餐/ 晚餐健康餐
新會員一登記註冊，即享免費$100儲值咭，再邀請一個朋友(成功訂餐)又加多$100儲值額，活動上限可以有$1000儲值額 （詳細規則請看電子優惠券條款及詳情。）
文、PHOTO / 試伏小薯
（以上食評純屬個人意見，與平台立場無關）
